ភ្នំពេញ៖ ក្រុមអ្នកជំនាញអចលនទ្រព្យបាននិយាយថាប្រជាជនខ្មែរភាគច្រើនមិនទាន់មានការពេញនិយមរស់នៅតាមខនដូនៅឡើយទេ ហើយការទិញខនដូរបស់ពួកគាត់ភាគច្រើនគឺជាការវិនិយោគសម្រាប់ជួល។ ដោយប្រជាជនខ្មែរមិនទាន់ទម្លាប់រស់នៅតាមខនដូនៅឡើយ ពួកគាត់ទិញខនដូភាគច្រើនគឺទុកសម្រាប់ជួល ដែលផ្ដល់ផលចំណេញដល់ពួកគាត់ ហើយរហូតមកទល់បច្ចុប្បន្នក្នុងខនដូចំនួន១៦គម្រោង និងមានជាង៣០០០unitលក់បានជាង៧៥ ភាគរយរួចហើយក្នុងនោះ៨០ភាគរយទិញដោយជនបរទេស និង២០ភាគរយទិញដោយជនជាតិខ្មែរ។
មូលហេតុដែលជនជាតិខ្មែរ មិននិយមរស់នៅតាមខនដូដោយសារពួកគាត់ចូលចិត្តរស់នៅក្នុងភាពឯករាជ្យ និងការចំណាយលើការថែទាំលើចំណែក នៃកម្មសិទ្ធិរួមមានតម្លៃថ្លៃ។ ប៉ុន្តែខ្ញុំគិតថានៅរយៈពេល១០ឆ្នាំខាងមុខ ឥរិយាបថរបស់ប្រជាជននឹងមានការផ្លាស់ប្ដូរនៅពេលដីកាន់តែចង្អៀត ពួកគាត់នឹងរស់នៅតាមខនដូដូចនៅតាមប្រទេសនានា។ តម្លៃនាំការថែទាំទៅលើចំណែក នៃសហកម្មសិទ្ធិរួមមានចន្លោះ០.៥០ដល់១ដុល្លារក្នុងមួយម៉ែត្រការ៉េ។
ការទិញខនដូសម្រាប់ជួលមានផលចំណេញជាងការវិនិយោគទៅលើផ្ទះល្វែង ឬវីឡា ប៉ុន្តែបើគិតពីការទិញដើម្បីលក់ គឺការទិញផ្ទះល្វែង ឬវីឡាមានភាពចំណេញខ្ពស់ជាង ប្រសិនជាស្ថានភាពសេដ្ឋកិច្ចមានដំណើរការល្អដូចគ្នា។ ដូចគ្នានឹងការលើកឡើងខាងលើ ដោយប្រជាជនខ្មែរភាគច្រើនរហូតដល់៩៥ភាគរយទិញខនដូ គឺទុកសម្រាប់ជួលឲ្យជនបរទេស ដោយសារពួកគាត់ចូលចិត្តរស់នៅផ្ទះមានភាពដាច់ៗពីគ្នា ប៉ុន្តែបើនិយាយអំពីការវិនិយោគលើខនដូ ការទទួលបានប្រាក់ពីការជួលត្រលប់មកវិញក្នុងចន្លោះ១០ទៅ១២ភាគរយ គឺជាការវិនិយោគសមរម្យបំផុត។ ឧទាហរណ៍ថា ប្រសិនជាផ្ទះមានតម្លៃ១០០.០០០ដុល្លារអាចជួលបាន៦០០ ទៅ៧០០ដុល្លារក្នុងមួយខែគឺជាការវិនិយោគល្អ ប៉ុន្តែបើតម្លៃផ្ទះមានរហូតដល់៣០០.០០០ដុល្លារ និងបានទទួលផលត្រឹម១.០០០ ទៅ១.៥០០ដុល្លារក្នុងមួយ ខែវាមិនមែនជាការវិនិយោគល្អនោះទេ។
ការធ្វើអង្កេតកន្លងមកបានរកឃើញថា មិនសូវមានតម្រូវការខនដូច្រើននោះទេ ដោយសារខនដូនៅកម្ពុជា មិនទាន់មានសេវាកម្មល្អ និងមានស្តង់ដារអន្តរជាតិនៅឡើយទេ។ ខនដូភាគច្រើនមិនសូវមានការជួលពេញៗនៅឡើយទេ ដូចជា Rose condo គាត់សាងសង់ និងរចនាតាមរបៀបចិន ការរៀបចំបែបអឺរ៉ុប និងស្តង់ដារអន្តរជាតិមិនទាន់មាននៅឡើយទេ។
ការកសាង និងរៀបចំរចនាសម័្ពន្ធខនដូបែប Western គឺមានការពេញនិយមទាំងជនជាតិចិន អឺរ៉ុប និងជនជាតិផ្សេងៗទៀតចង់រស់នៅ។ នេះបើតាមការអះអាងរបស់លោករាត្រី។
លោកស៊ឹង ប៊ុណ្ណា ប្រធានសមាគមវាយតម្លៃអចលនទ្រព្យកម្ពុជាបានមានប្រសាសន៍ថា ប្រជាជនខ្លះពេលគាត់ទិញរួច គាត់បានចូលទៅរស់នៅតាមខនដូផងដែរ ដោយក្នុងចំណោមអ្នកទិញខនដូប្រមាណ១០០នាក់ មាន៣០នាក់ចូលទៅរស់នៅខ្លួនឯង ក្រៅពីនោះកាន់កាប់ដោយជនបរទេស ។ លោកបន្តថា ការវិនិយោគទៅលើខនដូ និងការទទួលបានប្រាក់ត្រលប់មកវិញក្នុងចន្លោះ ៦ទៅ៧ភាគរយនៃទឹកប្រាក់វិនិយោគក្នុងមួយខែ គឺអាចល្អផងដែរ ។
លោកបន្តថា “ទោះជាយ៉ាងណាហេដ្ឋារចនាសម្ព័ន្ធខនដូរបស់យើងមិនអាចធៀបជាមួយប្រទេសជិតខាងយើង ដូចជាប្រទេសថៃបាននៅឡើយទេ ដោយសារគេមានបទពិសោធន៍លើវិស័យនេះច្រើនជាងយើង និងយូរជាងយើង” ៕
ចេញផ្សាយ ៖ ០២/០៨/២០១២
សូមចូលរួមបញ្ចេញមតិចំពោះ ៖ ការទិញខនដូសម្រាប់ជួលមានចំណេញច្រើន
