ភ្នំពេញៈ សម្រាប់ព្រឹត្តិការណ៍កីឡាអូឡាំពិករដូវក្តៅ ឆ្នាំ២០១២ នាទីក្រុងឡុងដ៍ ប្រទេសអង់គ្លេស កម្ពុជាយើង មាន៤ប្រភេទ កីឡាក្នុងនោះមាន អត្តពលិក ចំនួន៦នាក់ កំពុងតែត្រៀមខ្លួន ទៅចូលរួមប្រកួត។ លោកវ៉ាត់ចំរើនអគ្គលេខាធិការគណៈកម្មាធិការជាតិអូឡាំពិកកម្ពុជា (NOCC) បានប្រាប់ឱ្យដឹងថាក្នុងការចូលរួមព្រឹត្តិការណ៍ពិភពលោកនារដូវកាលនេះខាងកម្ពុជាយើងមាន៤ប្រភេទកីឡា គឺហែលទឹកអត្តពលកម្មតេក្វាន់ដូ និងចុងក្រោយគឺយូដូ បន្ទាប់ពីបានទទួល ការអនុគ្រោះ (Wild-Card) សម្រាប់កីឡាតេក្វាន់ដូ ពេលនេះកម្ពុជាបានទទួល ការអនុគ្រោះសម្រាប់ កីឡាយូដូមួយរូបទៀតហើយ ។
បន្ទាប់ពីធ្វើការពិចារណាមួយរយៈមកសហព័ន្ធកីឡាយូដូអន្តរជាតិ និងគណៈកម្មាធិការ អូឡាំពិកអន្តរជាតិ បានផ្ដល់ការអនុគ្រោះ ដល់កីឡាករយូដូ កម្ពុជា ដែលមានឈ្មោះ សុខុម រតនមុន្នី សម្រាប់ការចូលរួមប្រកួត កីឡាអូឡាំពិក នៅទីក្រុងឡុងដ៍ ប្រទេសអង់គ្លេស ។
លោកបានបញ្ជាក់បន្ថែមថា បើយើងអន់ខ្លាំងពេក ក៏គេលំបាកនឹងផ្ដល់ការ អនុគ្រោះឱ្យ ណាស់ដែរ តែនេះយើងមាន សមត្ថភាពគ្រាន់បើដែរ ទើបបាន ទទួល Wild-Card បែបនេះ ដែល សុខុម រតនមុន្នី ប្រកួតក្នុងប្រភេទ ទម្ងន់ពី ៥០គីឡូក្រាម ទៅ ៦០គីឡូក្រាម ហើយកីឡាករ រូបនេះក៏ជាម្ចាស់ មេដាយ សំរឹទ្ធ ដែរកាលពី SEA Games ទី២៦ នៅប្រទេសឥណ្ឌូនេស៊ី នាឆ្នាំ២០១១ផងដែរ ។
សូមបញ្ជាក់ថា អត្តពលិកទាំង៦រូបនោះមាន កីឡាករ ហែម ថុនពន្លឺ និងកីឡាការិនី ហែម ថុនវិទីនី (ហែលទឹក ៥០ម៉ែត្រដោយសេរី), កីឡាការិនី ស៊ន ដាវីន (តេក្វាន់ដូ), កីឡាករ គៀង សាម៉ន និងកីឡាការិនីចាន់ សីហា (អត្តពលកម្ម) និងចុងក្រោយគឺកីឡាករ សុខុម រតនមុន្នី (យូដូ) ៕
បញ្ចូលដោយ ៖ កុយរដ្ឋា
ចេញផ្សាយ ៖ ១៣/០៦/២០១២
ប្រភព ៖ ដើមអំពិល
សូមចូលរួមបញ្ចេញមតិចំពោះ ៖ អត្តពលិកកម្ពុជា៦រូបត្រៀមទៅអូឡាំពិក...
