ភ្នំពេញៈ មជ្ឈមណ្ឌល បណ្តុះបណ្តាល ជំនាញ និងទទួលការថត ភាពយន្តនៅកម្ពុជា ហៅកាត់ថា CFC (Cambodia Film Commission) កាលពីថ្ងៃទី៧ ខែមិថុនា ឆ្នាំ២០១២ កន្លងទៅ បានប្រារព្ធពិធីបិទការចាក់បញ្ចាំងនៃវគ្គបញ្ចប់កម្មវធីទូរទស្សន៍កោះឡាន់តា ដែលថត និងកាត់ដោយស្នាដៃអ្នកបច្ចេកទេសកម្ពុជាសុទ្ធសាទក្រោមអធិបតីភាព លោក ថោង ខុន រដ្ឋមន្រ្តីក្រសួងទេសចរណ៍។
ក្រោមជំនួយពីទីភ្នាក់ងារបារាំងដើម្បីការអភិវឌ្ឍន៏ប្រចាំនៅកម្ពុជា CFC បានទទួលជោគជ័យយ៉ាងខ្លាំងក្នុងរយ:ពេលតែ២ឆ្នាំប៉ុណ្ណោះ។ មជ្ឈមណ្ឌល CFC បានទាក់ទាញចំណាប់អារម្មណ៍ ផលិតករបរទេសឱ្យមកផលិតភាពយន្ត របស់គេ នៅក្នុងប្រទេសកម្ពុជា ពោលគឺមានកំណើនរហូតដល់៤០០% បើប្រៀបធៀប មុនឆ្នាំ២០០៩ តាមរយៈទិន្នន័យដែល ផលិតកម្មបរទេស បានមកថតភាពយន្ត នៅកម្ពុជា។
នៅចុងឆ្នាំ២០១១ និងដើមឆ្នាំ២០១២ ក្រោមការជួយជ្រោមជ្រែង និងយកចិត្តទុកដាក់ពី មជ្ឈមណ្ឌល CFC ផលិតកម្ម Adventure Line Productions នៃសាធារណរដ្ឋបារាំង ដែលផលិត កម្មវិធីទូរទស្សន៍ “Koh Lanta” នៅកម្ពុជា។ កម្មវិធីនេះកំពុងមានការនិយមទស្សនា ពីប្រជាជនលើពិភពលោក។ ដោយឡែកគ្រាន់តែសាធារណ:រដ្ឋបារាំងមានទស្សនិកជនប្រមាណពី ៧ ទៅ ៨ លាននាក់រង់ចាំទស្សនា ។ ការថតកម្មវិធីទូរទស្សន៍នេះ បានផ្ដល់ការងារដល់អ្នកបច្ចេកទេសជំនាញខ្មែរចំនួន៤៥នាក់ និង១០០នាក់ផ្សេងទៀតជាជនជាតិខ្មែរតែមិនមែនជាអ្នកអាជីពភាពយន្ត។
ឆ្លងកាត់ការយកចិត្តទុកដាក់បំពេញការងាររបស់អ្នកបច្ចេកទេសខ្មែរយើង បានធ្វើឱ្យការថតកម្មវិធី “Koh-Lanta” ដែលមានរយ:ពេល៨សប្តាហ៍ នៅកោះរ៉ុង ខេត្តព្រះសីហនុ បានបញ្ចប់ទៅដោយជោគជ័យ។ ដោយមានការពេញចិត្ត និងបានស្គាល់ច្បាស់ពីគុណភាពការងាររបស់អ្នកបច្ចេកទេសខ្មែរយើង ផលិតករនៃផលិតកម្ម Adventure Line Productions បានស្នើមកមជ្ឈមណ្ឌលជាថ្មី ដើម្បីសុំយកអ្នកបច្ចេកទេសចំនួន២០នាក់ទៅបំពេញការងារក្នុងប្រទេសម៉ាឡេស៊ី ដែលបច្ចុប្បន្នផលិតកម្ម Adventure Line Productions បាននឹងកំពុងរៀបចំផលិតកម្មវិធី “Koh-Lanta” វគ្គថ្មីមួយទៀតនៅប្រទេសម៉ាឡេស៊ីដែលចាប់ដំណើរការពីថ្ងៃទី ២២ ខែមីនា ដល់ថ្ងៃទី ១៥ ខែឧសភា ឆ្នាំ ២០១២ ។
នេះជាលើកទីមួយហើយ ដែលអ្នកបច្ចេកទេសខ្មែរយើងមានឱកាសចូលរួមបំពេញការងារនៅ លើឆាកអន្តរជាតិជាមួយក្រុមការងារបរទេសដោយបង្ហាញពីសមត្ថភាពប្រកបដោយ ជំនាញវិជ្ជាជីវៈក្នុងវិស័យភាពយន្តក្នុងនាមជាជនជាតិខ្មែរដែលបញ្ជាក់ឱ្យឃើញតាមរយៈទេពកោសល្យរបស់ពួកគេ និងការឆ្លងកាត់ការបណ្តុះបណ្តាលរយ:ពេលខ្លីជាមួយ CFC ព្រមទាំងការហ្វឹកហ្វឺនការងារផ្ទាល់ជាមួយក្រុមកាងារបរទេស ធ្វើឱ្យប្រទេសយើងមានធនធានមនុស្សដែលអាចទុកចិត្តបានសម្រាប់បំពេញការងារក្នុងវិស័យផលិតភាពយន្តជាមួយបរទេសទាំងក្នុង និង នៅក្រៅប្រទេស។ ពួកគេទាំងអស់នោះនឹងក្លាយជាអ្នកចូលរួមស្ដារ និងអភិវឌ្ឍន៍វិស័យភាពយន្តនៅកម្ពុជា នាពេលអនាគតដ៏ខ្លីខាងមុខនេះ។
កែសម្រួលអត្ថបទដោយ ៖ កុយរដ្ឋា
ចេញផ្សាយ ៖ ០៨/០៥/២០១២
ដកស្រង់ពី ៖ គេហទំព័រ Dap-News
